عمركوم طرحت السؤال داك الحليب للي كاتشربوه أشنو الأصل ديالو و كيفاش تكون؟
أجيو نعرفو كيفاش تكون من ناحية الاكتشافات العلمية ومن ناحية ما ذكر في القرآن الكريم...
العلماء قدرو مؤخرا أنهم يكتاشفو آلية انتاج الحليب عند الأبقار (الإناث بصفة عامة فكلشي المخلوقات)، حنا ناخدو مثال ديال الأبقار حيت هي المصدر الأساسي ديال الحليب لي كانشربوه، البقرة ملي كاتاكل العلف أو العشب كا تم عملية الهضم وداك العشب كايتحول لفرث، والفرث هو الطعام المهضوم، ف الضرع ديال البقرة كاين واحد الخلايا كاتسمى الخلايا اللبنية للي كا تاخد من الفرث الأحماض الدهنية، و فوق من هاد الخلايا كاين شعيرات دموية، للي كاتاخد منهم البروتينات و الكالسيوم والمواد المعدنية للي كاتدخل فتكوين الحليب، يعني كخلاصة هاد الخلايا كاتاخد من مكونات الفرث والدم، وخاصكم تعرفو كمعلومة أن انتاج لتر واحد من الحليب كايحتاج مرور 500 لتر من الدم فضرع البقرة، باش يتم امتصاص المواد اللازمة من البروتينيات والكربوهيدرات والدهون والعناصر والفيتامينات والهرمونات اللازمة باش يتصيب ذاك اللتر ديال الحليب هادشي كتاشفوه العلماء غير مؤخرا مع تطور العلم والأجهزة للي كاتسمح بالقيام بتجارب من هاد النوع...
لكن إلى جينا للقرآن الكريم كانلقاو واحد الآية كاتقول:
"إِنَّ لَكُمْ فِي الْأَنْعَامِ لَعِبْرَةً ۖ نُّسْقِيكُم مِّمَّا فِي بُطُونِهِ مِن بَيْنِ فَرْثٍ وَدَمٍ لَّبَنًا خَالِصًا سَائِغًا لِّلشَّارِبِينَ" لاحظو أن الله تعالى ذكر هاد القضية فالقرآن قبل 14 قرن من اكتشاف العلماء أن الحليب المصدر ديالو فرث ودم...
#رمضان_كريم
