موضوع للنقاش

قال الله تعالى:

"ألم يروا كم أهلكنا من قبلهم من قرن مكناهم في الأرض ما لم نمكن لكم وأرسلنا السماء عليهم مدرارا"

هاد الآية الكريمة كاتحمل بزاف ديال المعاني وخاصها بحث فالكتب القدام، أشنو المقصود بهاديك مكناهم في الأرض ما لم نمكن لكم، واش كاتعني أنه كان هناك أمم سابقة، واصلين لواحد الدرجة من التطور باقي ما وصلناهاش حنا؟

واش كانو عندهوم وسائل حديثة بحال للي عدنا أو أكثر تطورا؟ 

دوك الأهرمات و ردم يأجوج ومأجوج (سبائك الحديد مع النحاس) .... هاد الاتقان والتصميم الهندسي بهاد الحجم مايمكنش يكون بوسائل بدائية.

كم هي بطيئة سرعة الضوء

#كم_هي_بطيئة_سرعة_الضوء

تقدر تبان ليكوم هاد الجملة ساخرة أو ما عندها معنى لكن أجي نهضرو شوية على بطء سرعة الضوء..كيما كاتعرفو السرعة ديال الضوء كتوصل ل 300.000 كيلومتر فالثانية الواحدة و بغينا رقم جد دقيق غادي يكون 299972458 متر فالثانية هههه عارفك ماقريتيش داك الرقم رجع قراه مزيان...حتى شي حاجة فهاد الكون ماتقدر تفوت سرعة الضوء و إلى بغينا نفهمو كثر هاد السرعة نتخيلو واحد الفوتون(جزيئة ضوء) هاد الجزيئة تقدر تدور على الكرة الأرضية 7 ديال المرات و نص ف ثانية واحدة وتقدر تقطع المسافة ما بين الأرض والبلاصة لي بان فيها محمد الخامس طيب الله ثراه ف 1.255 ثانية...مهم ما علينا أش علاقة هادشي ب بطء سرعة الضوء...نتا مللي كاتشعل الفلاش ديال التيليفون ولا المصباح ديال شي بيت فداركم كايشعل فالبلاصة باش كاتحط يدك على قاطع التيار كاتلقى المصباح شعل لكن أجي نشوفو مثال آخر ناخدو مثلا الشمس...الضوء ديالها كايحتاج 8 دقائق باش يوصل لينا يعنى نتا ديما كاتشوف الشمس فحالة الماضي أو ببساطة إلى تفركعات الشمس ماغادي نسيقو الخبار حتى دوز 8 دقائق...ناخدو مثال آخر، مسبار نيوهورايزونز فاش داز من حدا أبعد جرم سماوي كايستكشفو الإنسان الكويكب ultima thule استغرقت البيانات باش توصل للكرة الأرضية 10 ديال السوايع...أقرب نجم للكرة للأرضية الضوء ديالو كايحتاج 4 سنين باش يوصلنا يعني نفس المثال ديال الشمس إلى مشا تفركع ما غا نعرفو حتى دوز 4 سنوات...ندويو غا على المجرة ديالنا...الضوء ديال المركز ديالها كايحتاج 25 ألف سنة باش يوصلنا... سرعة الضوء نسبية وهذا هو علاش خديت كعنوان بطء سرعة الضوء...هدا ما كان غير تعبير مجازي كايعبر على فساحة الكون...خديت مثال غير فالمجرة ديالنا لأنه إلى جينا ناخدو أمثلة فمجرات خرين أنولليو داويين على ملايين و ملايير السنوات الضوئية أو ربما بعض المسافات التي تفوق حدود العقل البشري...

#بيييس

ماذا لو استطعنا السفر بسرعة الضوء

#ماذا_لو_استطعنا_السفر_بسرعة_الضوء

تخيلو معايا كون كنا نقدرو نسافرو بسرعة الضوء. أجيو نديرو دراسة تحليلية فالموضوع وأشناهوما المعدات للي خاصنا...أقصى سرعة وصلها بنادم هي 40 ألف كيلومتر فالساعة وللي دارتها الرحلة أبولو 10 وكان فيها 3 ديال الناس...لكن إلى بغينا حقا نسافرو بسرعة الضوء أشناهوما المشاكل للي غا يواجهونا؟؟ غادي نبداو بأول مشكل للي هو هاد السرعة بحد ذاتها...قلت ليكم فمنشور سابق أن أقرب نجم للكرة الأرضية بروكسيما سانتوري بعيد علينا ب 4 سنوات ضوئية يعني إلى صيفطنا مركبة بمحرك أيوني كاتحرك بسرعة 56 ألف كيلومتر فالساعة غادي يخصنا 81 ألف سنة ضوئية باش نوصلو لبروكسيما سانتوري وفهاد الوقت غادي يتغير 2700 جيل فالكرة الكرة الأرضية...كاينة واحد الحالة نقدرو نوصلو بيها سرعة المركبة ل 240 ألف كيلومتر فالساعة و للي هي مناورة الجاذبية وللي كاتعتمد على الجاذبية ديال شي كوكب أو كويكب باش تزيد السرعة...لكن وخا مشينا بهاد السرعة غادي نحتاجو 19 ألف عام باش نوصلو لبروكسيما سانتوري...إلى تخيلنا أنه بنينا مركبة كاتمشي بسرعة الضوء غادي يخصنا 10 ألاف عام باش نوصلو لحدود المجرة ديالنا (فين أوا غادي) و إلى بغينا نسافرو لأقرب مجرة (المرأة المسلسلة) أو أندروميدا غادي يخصنا 2.5 مليون سنة ضوئية هادشي إلى كانت هاد المجرة باقية تقدر تكون تفركعات أو سرطها شي ثقب أسود لكن كيما قلت ليكم قبل إلى تفركعات المجرة فهاد اللحظة للي كاتقرى فيها نتا المنشور ما غادي تعرف حتى دوز 2.5 مليون عام...سالينا من المشكل اللول للي هو السرعة...ندوزو للمشكلة الثانية للي هي المركبة الفضائية...يستحيل تطبيقيا بناء مركبة فضائية كاتقتارب السرعة ديالها من سرعة الضوء لاحظ معايا راه قلت غير كاتقتارب ماشي كاتوصل...لكن نفتارضو أننا بغينا نحققو هاد الإنجاز فهاد الحالة غادي يخصنا مركبة بحجم كوكب القمر حيت الوقود ديالها غادي يكون التفاعلات النووية...نظريا ممكن نوصلو ل 70 فالمائة من سرعة الضوء باستخدام المادة المضادة كوقود لكن خاصكوم تعرفو أن تخليق ميليغرام واحد من المادة المضادة (البوزيترون) كايكلف 25 مليون دولار و العمر ديالو 20 دقيقة...المشكلة الثالثة للي غا تواجه البشر هو الفضاء العنيف...إلى كنا غادي نسافر بسرعة 70 فالمائة من سرعة الضوء غادي يخصنا مركبة سمك الجدار ديالها على الأقل 100 متر علاش؟؟؟ ببساطة لأنه إلى كنتي غادي بهاد السرعة واصطدمتي بجزيئة بحجم حبة رمل أو أقل بكل بساطة غادي تنفاجر السفينة..لأن حبة الرمل غادي تسبب بثقب صغير بالحجم ديال حبة الرمل فالمركبة داك الثقب كافي أنه يتسبب فرق فالضغط مابين الفراغ فالفضاء والأوكسيجين داخل المركبة الشيء للي غايتسبب ف انفجار مهول وفشل الرحلة وهادوك مساكن للي فالمركبة إلى كانو ضاربين نص الطريق ماغادين نسيقو خبار الموت ديالهوم حتى دوز 3 سنين...الله يجعل شي بركة عياو ليا يديا بالكتبة ههههه

#بييييس